«شاب جدع ويستاهل النجاح».. زينة منصور ترد على الهجوم على كزبرة بعد أول بطولة مطلقة ليه

أكدت الفنانة زينة منصور أن الفنان كزبرة يستحق النجاح، مشيدةً بشخصيته على المستوى الإنساني، إلى جانب موهبته الفنية.

وقالت زينة منصور خلال مقابلة تلفزيونية في برنامج تفاصيل مع الإعلامية نهال طايل عبر فضائية صدى البلد 2 : « كزبرة يستاهل.. والله العظيم يستاهل، أولًا بغض النظر عن كونه فنان، هو على المستوى الإنساني ولد جدع، ابن بلد، بيحترم أهله، بيحترم أمه وأبوه وإخواته، جدعنة كده عارفة جدعنة ولاد البلد، رغم إنه صغير في السن بس تصرفاته كلها رجولة جدًا».

وأضافت زينة منصور: «انبسطت جدًا بالشغل معاه، وأوريدي هو كان واخد فرص، يعني ما جاش كده فجأة بطولة، يعني في ناس كتير السنة دي، وبعدين إحنا المفروض إن إحنا ندعم الشباب وإن إحنا نقف جنبهم، ما كل اللي طلعوا نجومنا الكبار كانوا كلهم صغيرين».

وتابعت: «فكونه أخد فرصة وأخد عملها كويس واجتهد فيها، ولسه مع الخبرة هيبقى أحسن وأحسن وأحسن، لا، كانت من أحلى التجارب، أنا انبسطت جدًا بالشغل معاه.. جدًا».

وأشارت زينة منصور إلى أن كزبرة يتعامل بتلقائية، قائلة: «تلقائي، بكده مع ربنا كده.. فاهمة إنتي؟ ما بيحسبهاش، ما يقعدش يقول مش عارفة إيه، أصلي لو عملت إيه أصلي.. وبعدين برج الجوزاء، فمجنون بكذا شخصية، يعني اللي هو فجأة يبقى مش عارفة إيه، وأنا قلقان، وأنا مش.. أقوله يا ابني سيبها على الله.. يا ابني سيبها على الله، آه والله».

وأضافت زينة منصور: «وناجح سينمائيًا، يعني ما هو عامل فيلم تاني دلوقتي "محمود الثاني" ده مكسر الدنيا، وجايبين إيرادات وكده، ليه يعني؟ هو علشان كزبرة يعني كان الأول بيهزر أو بيعمل كوميدي أو حاجة، فمعنى إن هو ياخد أول بطولة دراما معنى كده إن هو يتقاجم؟ لا، يعني أنا مش شايفاها».

وتابعت زينة منصور مؤكدة أهمية دعم الشباب وتجديد الدماء في الوسط الفني والدليل أنه كان معنا الأستاذ سيد رجب والأستاذة هالة صدقي، وهما من الأساتذة الكبار، وعملا معه بشكل طبيعي، ولم يقل أحد إنه لا يصلح أو لا يمكننا العمل معه. لماذا لا نعمل معه؟ بالعكس».

واختتمت زينة منصور حديثها قائلة: «يعني لو ربنا كرمه وتكررت التجربة، آه أشتغل مع كزبرة طبعًا».